Обилните снежни врнежи кои синоќа го зафатија Скопје направија проблеми во одредени делови од градот. Најтешко беше во населбата Железара каде синоќа паднато дрво предизвикало спој во трафо–станица кој беше проследени со експлозија што ги вознемири жителите. Екипи на ЕВН веднаш биле на терен за отстранување на дефектот, а повик бил примен и во Противпожарна бригада на Скопје, од каде испратиле возило, но немало потреба од интервенција. За среќа, во инцидентот немало повредени лица.
-Околу 23 часот настанал спој на далековод и дрво во Железара кој бил проследен со експлозија. Веднаш, на местото на настанот се упатија и противпожарната единица и полицијата. За среќа, нема повредени, а во моментов надвор од употреба е трафо–станица на чија санација веќе работат екипи на ЕВН, напиша на Фејсбук градоначалникот Борис Георгиевски.
Во Аеродром има неколку паднати дрвја, најмногу штета е направена при пад на едно дрво директно врз автомобил на булеварот Јане Сандански 36. Возилото е оштетено, и се чекаа служби да го тргнат дрвото кое буквално го поклопило. На подрачјето на општина Центар, пак, на улица „50 дивизија“ кај МВР голема гранка од исушеното дрво падна врз неколку автомобили. За среќа, не е предизвикано големо оштетување. Читатели ни пишуваат дека дрвја врз автомобили паѓале и во Кисела Вода… 
Овие случаи повторно го актуелизира прашањето околу отстранувањето на исушените дрвја по градот. Тие, посебно во вакви временски непогоди, претставуваат опасност како за граѓаните така и за автомобилите.
