Нема ден да нема по два – три напади кои ќе си ги разменат СДСМ и ВМРО-ДПМНЕ. Тоа потоа се прелева на социјалните мрежи и многу граѓани се „глодаат“… и така со години…
Вчера и денес најактуелно им е чиј е сега, а и чиј бил порано адвокат Тони Менкиновски. Прво СДСМ обвини дека во случајот со Орце Камчев и неговото притворање, неговиот адвокат Менкиновски е партиски функционер на најголемата опозициска партија. Потоа опозиционерите возвратија дека истиот адвокат го бранел и лидерот на владечаката партија кога бил обвинет за земање мито. И така во недоглед…
А можеби на крајот ќе се сфати дека Менкиновски сепак првенствено е адвокат кој, како што тоа му налага професијата, ги застапува оние лица кои бараат правна помош. 
Но, дали партиите ќе сфатат дека претераа со жолчни и ниски расправи беа потреба освен пропаганда? До кога се што може да се искористи за пресметка, за предизвикување на кавга, продлабочување на поделби… се користи до максимумот?
Во меѓувреме: здравствената криза со корона вирусот расте ли расте, остануваат без работа на илјадници лица, блокирана е евроинтеграцијата, образованието крахира…, ама ресурсите се трошат на окткривање кого бранел некој си адвокат.
А до вчера ги слушавме (исто така често како и нападите) како и мислат само добро на Македонија, како што ги слушавме и повиците на Пендаровски и Заев за меѓупартиско помирување, обединување, заедничко собирање и исправање пред предизвиците пред кои се наоѓа државата…
