Вечерва на големата сцена на Македонскиот народен театар, со почеток во 19 часот ќе се прикаже документарниот филм „Иднината започнува денес“.
Филмот е практично најава за театраскиот фестивал во Бутрини, Албанија што ќе се случи во јуни следната година, а содржински претставува ретроспектива на седумнаесетте претходни изминати изданија, почнувајќи од 2003 година. Сместен во јужна Албанија недалеку од Саранда, Бутринти зрачи со медитеранска убавина – мешавина на археологија, култура, архитектура и природа.
-Поради кризата предизвикана од пандемијата на корона вирусот, оваа година фестивалот беше откажан, а селектираната програма, помеѓу која е и театарската претстава ‘Отело’ во копродукција на Перипетија Продукција, МНТ и БНП, е префрлена за следната година. Преку прикажување на филмот за богатата фестивалска долгогодишна историја во Скопје, Белград, Тирана и Ѓаково, но и преку истакнување дека театарските професионалци се стремат кон нова посветла иднина која започнува ‘денес’ симболично се означува дека и покрај сите препреки театарот повторно како феникс ќе се издигне од пепелта, вели режисерката Нина Николиќ. 
