Би било грев пред историјата ако Бугарија и С. Македонија не успеат да најдат компромис. Треба само да ја направиме историјата мост на пријателството и блискост, а не урнат мост преку кој Р.С. Македонија не може да помине, порача бугарскиот премиер Бојко Борисов на денешната средба со македонскиот министер за надворешни работи Бујар Османи.
Тој потенцира дека не треба да има политички игри и дека сегашните перспектива и момент се исклучително важни. Во однос на денешната Резолуција на Европскиот парламент Борисов рече дека е „многу вознемирен“.
– Многу сум вознемирен за вклучувањето на ОМО Илинден и на македонското малцинство во Бугарија во резолуција во Европскиот парламент. Ова е една политичка резолуција на Европскиот парламент. Ова во никој случај не е корисно во овој момент кога бараме компромис – и за историчарите и за нашите политички партнери во С. Македонија во Скопје, за да се најде решение за ова прашање. Не знам од каде дојде ова. но е факт, додаде тој. 
За потсетување, европратениците во резолуцијата ги повикуваат бугарските власти на спроведување на релевантните пресуди на Европскиот суд за човекови права, при што се наведени меѓу другото и пресудите кои се однесуваат на неможноста на македонското непризнато малцинство во Бугарија да регистрира свое здружение или политичка партија.
Инаку, на средбата Бујар Османи, пак, изјави дека имаме Договор за пријателство кој нѐ обврзува и на политичка и на експертска соработка.
–Само преку отворен, искрен и позитивен пристап во соочувањето на историските факти со денешната реалност, можеме да ги надминеме разликите и да ги идентификуваме заедничките точки кои нѐ поврзуваат, рече Османи.
